Һакимжан Мәрван оғли Һәмраев



        Һакимжан Мәрван оғли Һәмраев 1964- жили Панфилов наһийәси Садир йезисида туғулди. 1971-1979-жиллири Садир йезисидики сәккиз жиллиқ мәктәпни пүтирип, андин кейин 1979-1981-жиллири Киров намидики оттура мәктәптә оқуп, оттура билим алиду. 1986-жили Абай намидики Қазақстан педагогика институтидики филология факультетиниң рус-уйғур бөлүмини тамамлайду. Алий оқуш орнини тамамлиғандин кейин 1986-1987-жиллири Вәтән алдидики борчини ада қилиду. Кәлгүси алим 1987-жили һәрбий хизмәттин қайтип келип, йолланма билән Қазақстан Пәнләр Академияси Уйғуршунаслиқ институтида илмий хадим болуп ишләйду. Қазақстан Пәнләр Академиясиниң мухбир әзаси, филология пәнлириниң доктори, профессор, тонулған фольклорист Р. Бердибаев рәһбәрлигидә 1992-жили «Уйғур тарихий қәһриманлиқ дастанлири» мавзусида диссертациясини һимайә қилип, филология пәнлириниң намзити илмий дәрижисигә егә болиду. 1993-1996-жилллири Уйғуршунаслиқ институтиниң илмий кативи болуп хизмәт қилиду.
        1996-жилдин бу ян Яркәнт педагогикилиқ колледжида әмгәк қилип, уйғур тили вә әдәбияти пәнлиридин дәрис бериватиду.
        Һакимжан Мәрван оғлиниң тәһрирлигидә 2003-жили Һосманжан Қәмбәрийниң «Өчмәс мирас» шеирлар топлими, 2004-жили Алмута шәһиридики «Қиян» нәшриятида «Уйғур тили вә әдәбияти пәни бойичә тест тапшурмилири», 2004-жили Астана шәһиридә алий оқуш орунлириниң филология факультети вә колледж студентлириға беғишланған «Уйғур әдәбияти» дәрислиги, 2006-жили Яркәнт диярида яшап, ижадийәт билән шуғуллиниватқан шаирлар ижадидин тәркип тапқан «Ана жутқа муһәббәт» шеирлар топлимини нәширгә тәйярлиди.
       Һакимжан Мәрван оғли келәчәк устазларға дәрис бериш усулини үгитиш арқилиқ һәқиқий устазниң еғир вә мәшәқәтлик паалийитиниң назук қир-сирлирини үгитиватиду, яшларниң илмий көз қаришини шәкилләндүрүштә өз хәлқиниң, Вәтининиң һәқиқий вәтәнпәрвәрлири болуп йетилишидә, һаяттин тоғра йол тепишиға ғәмхорчи устаз сүпитидә аянмай әмгәк қилип келиватиду.

**********************************
                      


© СТРАННИК    Мәрһәмәт
Hosted by uCoz